Линктер

ЧУКУЛ КАБАР!
25-Сентябрь, 2021 ишемби, Бишкек убактысы 16:39

Кабулдан учкан 35 оогандык казак Алматыга келди


Ооганстандан келгендер Алматы аэропортунда, 9-сентябрь, 2021-жыл.

9-сентябрда Казакстандын Коргоо министрлигинин атайын учагы 41 кишини Ооганстандан чыгарып келди. Кабулдан учкан борт Алматы аэропортуна келип конду. Коңшу өлкөнүн Тышкы иштер министрлиги тараткан расмий маалыматка караганда, келгендердин 35и ооганстандык казактар.

Тышкы иштер министрлигинин басма сөз катчысы Айбек Смадияров “Азаттык” радиосунун казак кызматына 35 кишиден сырткары төрт казакстандык, бир кыргызстандык жана Казакстанда туруктуу жашаган бир оогандык учуп келгенин кабарлады.

Бул "Талибан" радикал тобу бийликке келгенден бери Ооганстандан Казакстанга келген алгачкы каттам. Нур-Султан буга чейин Кабулдан өз жарандарын коопсуздукка байланыштуу чыгарып кеткен эле.

Акордонун басма сөз катчысы Берик Уали "Келген жүргүнчүлөр убактылуу карантинге алынат. Бул атайын рейс талибдер менен макулдашылып уюштурулду", - деп жазды.

8-сентябрда Казакстандын президенти Касым-Жомарт Токаев Нур-Султан Ооганстандагы этностук казактарды тарыхый мекенине алып келүү маселесин чет өлкөлүк өнөктөштөрү менен караштырып жатканын айткан.

15-августта "Талибан" радикал кыймылы Кабулду басып алгандан кийин Ооганстанда жашаган казактар Нур-Султанга кайрылып, көчүрүп кетүүнү суранган. Маалыматка караганда, Ооганстанда ондогон этностук казак жашайт.

Facebook шеринеси

XS
SM
MD
LG