Линктер

ЧУКУЛ КАБАР!
17-Сентябрь, 2021 жума, Бишкек убактысы 07:41

АКШ менен Кытайдын лидерлери жети айдан кийин телефондон сүйлөштү


Жо Байден менен Си Цзинпин. Бээжин, 4-декабрь, 2013-жыл.

Дүйнөдөгү экономикасы өнүккөн АКШ менен Кытайдын лидерлери соңку жети айда алгачкы жолу телефондон сүйлөштү.

Ак үй тараткан билдирүүдө АКШнын президенти Жо Байден менен Кытайдын лидери Си Цзинпиндин "терең стратегиялык" сүйлөшүүсүндө "биздин жалпы кызыкчылыктар, баалуулуктар жана күткөнүбүз дал келген маселелер талкууланды" - деп айталат.

Быйыл январда Байден расмий бийликке киришкенден тарта кытай лидери менен эки гана жолу сүйлөштү. Чоң экономикасы бар эки державанын мамилесинде бир топ жылдан бери соода-сатыкка, киберкоопсуздукка жана адам укуктарына байланыштуу чыңалуу бар. Вашингтон Бээжиндин Шинжаңдагы репрессиялык саясатын кескин сындап келсе эми ага COVID-19 вирусунун кайдан келип чыкканын иликтөөдө кытай ачык-айкындуулукту камсыз кылбай жатканы да кошулган.

Андан сырткары АКШ-Кытай мамилесинде Тайванга, Түштүк-Кытай деңизиндеги аймактык талаштарга барып такалган маселелер бар.

Эки өлкө ортосунда климаттын өзгөрүшү, Корей жарым аралында өзөктүк кризисти токтотуу жана эки мамлекеттин экономикасынын туруктуулугун камсыздоо максатында кызматташуу жолго коюлган.

Ак үй билдиргендей, Байден Кошмо Штаттар Кытай менен чыныгы жана жоопкерчиликтүү атаандаштыкты жактай турганын айтты.

Кытайдын мамлекеттик CCTV каналы Си Цзинпин америкалык кызматташына Вашингтон жараткан "олуттуу кыйынчылыктарды" айтканын билдирди.

Facebook шеринеси

XS
SM
MD
LG