Министрлер кабинетинин төрагасы Акылбек Жапаров 30 жылдын ичинде 650 миңден ашык кыргызстандык Орусиянын жарандыгын алганын билдирди. Бул тууралуу ал 19-октябрда Жогорку Кеңештин жыйынында айтты.
Парламенттеги өкмөттүк саатта Акылбек Жапаров миграция боюнча маалымат берди. Анын сөзүнө караганда, Кыргызстандын жарандары көбүнчө Евразиялык экономикалык биримдигине (ЕАЭБ) мүчө өлкөлөр – Орусия жана Казакстанга иштегени кетет. Расмий маалымат боюнча Орусияда миллиондон ашык кыргызстандык иштеп жүрөт.
“Орусияда 651 миңге жакын адам дактилоскопиядан өтүп, миграциялык каттоого турду. 73 миң жаран же 9% расмий каттоодон өтө элек. Маселенин баары ушул жарандарыбызга келип такалып атат. Алар өз убагында каттоодон өткөн жок. Мунун ичинде 38 миң 149 жаран “кара тизмеде” турат”, - деди Жапаров.
Расмий маалыматка таянсак, ушу тапта Түштүк Кореяда 6400, Түркияда 35 миңге жакын жана алыскы чет мамлекеттерде 40 миң ашык киши эмгектенүүдө.(BTo)
Facebook шеринеси