Президент Садыр Жапаров жапырт камакка алынган саясатчыларга жана активисттерге байланыштуу улуттук "Кабар" агенттигине комментарий берди.
Мамлекет башчы саясатчылар жана активисттер менен буга чейин да сүйлөшкөнүн, Кемпир-Абадга байланыштуу маселени түшүндүрүп бергенине карабай, майнап чыкпаганын билдирди.
"Кыскасы менден кеткен жок. Баары менен диалогго барып атам", - деди президент.
Жапаров камалгандардын ишине кийлигише албай турганын, чекитти сот кое турганын айтты.
23-октябрда Бишкекте жыйырмадан ашуун оппозициялык саясатчы менен активисттердин үй-жайында тинтүү жүргүзүлүп, милицияга чакырылып, 48 саатка камалган. Алардын ишине байкоо салып жатканын акыйкатчы Атыр Абдрахматова билдирген. Кармалгандар акыркы күндөрү "Кемпир-Абад суу сактагычынын жерин Өзбекстанга берилишине каршы" пикирин билдирип келатышкан.
Бишкектин Биринчи май райондук соту алардын бөгөт чарасын карап жатат.
Ички иштер министрлиги (ИИМ) кармалгандарга Кылмыш жаза кодексинин 36-278-беренеси (“Массалык башаламандыктарды уюштурууга даярдануу”) менен козголгон кылмыш иштин алкагында тергөө жүрүп жатканын маалымдаган.
24-октябрда Бишкекте жүздөгөн жаран жүрүшкө чыгып, камалгандарды бошотуу талабы менен президент Садыр Жапаровго кайрылуу жолдошту. Ошто да ондон ашуун активисттин катышуусунда ушундай талап менен митинг өттү.
Жалал-Абад жана Өзгөн шаарларында бийликтин саясатын колдогон акция уюштурулду.
Бийлик башындагылар кыргыз-өзбек чек арасына байланыштуу "чагымчылдар элге туура эмес маалымат берип жатканын" жүйо келтирүүдө. Садыр Жапаров кыргыз-өзбек чек арасына байланыштуу Кыргызстан зыян тартпагандай чечилип жатканын айтып келүүдө. (SE)
