Жогорку соттун судьясы, мыйзамсыз баюу боюнча айыпталып, камалып чыккан Камил Осмоналиев өз каалоосу менен иштен кетүүгө арыз берген. Жогорку Кеңеш анын арызын 7-декабрдагы сессияда карап канааттандырды.
Осмоналиев 2020-жылдын аягында мыйзамсыз баюу боюнча айыпталып камакка алынган. Анын үйү мамлекеттин балансына өткөн. 2021-жылы мамлекетке 70 миллион сом төгүп абактан чыккан.
Атайын кызмат тараткан маалыматта Осмоналиев киреше булактары жок туруп көптөгөн кыймылсыз мүлктү, Ысык-Көлдүн жээгиндеги пансионаттардан коттеждерди, соода борборлорунан коммерциялык объектилерди жана люкс-класстагы автоунааларды сатып алып, башка кишилерге каттатканы айтылган.
Былтыр 20-январда парламент Камил Осмоналиевди Жогорку соттун судьялыгынан убактылуу четтеткен. Анын үйү Улуттук "Манас" театрына кеңсе катары берилген. (TSh)
Facebook шеринеси