Кыргызстан Airbus H145 үлгүсүндөгү дагы бир тик учак сатып алды. Бул тууралуу президенттин басма сөз катчысы Эрбол Султанбаев бүгүн, 11-декабрда кабарлады.
"Тик учакты президент Садыр Жапаров көрүп, учуп сыноодон өткөрдү. Республикалык бюджеттин эсебинен Германиядан сатылып алынган жаңы тик учак Өзгөчө кырдаалдар министрлигинин балансына өткөрүлдү", - деп жазды Султанбаев.
Быйыл август айында да ӨКМ Airbus H145 үлгүсүндөгү тик учак сатып алган. Тик учактардын баасы канча экени тууралуу маалымат берилген жок. Жакында Орусиядан МИ-8 МТВ тик учагы гранттык негизде келери күтүлүп жатканын Султанбаев кошумчалады.
Август айына чейин Өзгөчө кырдаалдар министрлигинин өзүнүн тик учагы жок болгон. 2004 жана 2007-жылдары эки тик учак Нарында альпинисттерди куткаруу иши учурунда кыйрап калган.
Акыркы тик учагы эскилиги жеткендигине байланыштуу 2011-жылы колдонуудан алып салынган. Андан кийин тоо-таштардагы куткаруу иштерин Коргоо министрлигинин тик учактарын жалдап аткарып келди.
2015-жылдын жайында Токтогул районунун Чычкан капчыгайында чыккан өрттү өчүрүүгө Казакстандын тик учагы тартылган. (BCh)
Facebook шеринеси