Орусиянын Коргоо министрлиги 1-январда Украинанын куралдуу күчтөрү Донецк облусунун Макеевка аймагына ракеталык чабуул жасаганын билдирди.
Расмий маалыматка ылайык, HIMARS ракеталарынын соккусунда 63 орус аскери набыт болгон. Буга чейин Кремлге ыктаган каналдар жүздөгөн адамдар өлгөнүн кабарлашкан.
Украин армиясынын стратегиялык коммуникациялар департаменти өзүнүн Телеграм-каналында 400 киши набыт болгонун, дагы 300дөйү жараат алганын маалымдады. Донецк жикчилдеринин куралдуу күчтөрүнүн мурдагы башчысы Игорь Стрелков (Гиркин) каза тапкандардын жана жарадар болгондордун санын "жүздөгөн" деп сыпаттап, кампадагы ок-дарылар жардырылганын айтты.
Сокку аскерлер жайгашкан кесиптик-техникалык окуу жайынын имаратына тийген. Окуя болгон жерден тартылган видеодон лицейдин имараты талкаланганы көрүнүп турат. Украин каналдары каза болгондор Самара облусунан мобилизацияланганын кабарлашты.
Бир кол салууда 63 аскердин өлүмү - Орусия согуш башталгандан бери моюнга алган эң чоң жоготуу болуп саналат.
Орус армиясы Украина менен согуштагы жоготуулары тууралуу так маалымат бербейт. Пентагон ноябрда Орусия менен Украинанын ар биринин жоготкон жана жарадар болгон аскерлеринин саны 100 миңдей деп болжолдогон.
Согуш маалында мындай маалыматты көз карандысыз булактардан текшерүү кыйын.
