Мамлекеттик мүлктү башкаруу фондунан "Азаттыкка" билдиришкендей, Кыргызстандын мурдагы президенти Алмазбек Атамбаевдин Кой-Таштагы үйү Эмгек, социалдык камсыздоо жана миграция министрлигинин балансында.
Атамбаевдин бул үйү 2022-жылы Биринчи Май райондук соту тарабынан конфискация болуп, мамлекеттин менчигине өткөн. Аталган имаратта Балдардын реабилитациялык борбору ачылмак.
"2022-жылдын 13-апрелинде "Кадастр" мамлекеттик ишканасынын Аламүдүн райондук филиалы тарабынан Кой-Таш айылындагы №706 чиймедеги 2,7 гектар жер тилкесинде жайгашкан 1385 чарчы метр турак жай саламаттыкты чыңдай турган борбор катары катталган. Мамлекеттик мүлктү башкаруу фондунун ошол эле жылдын 13-июлундагы буйругу менен конфискацияланган мүлк Эмгек, социалдык камсыздоо жана миграция министрлигинин балансына берилген. Бирок министрликтин өкүлдөрү обьекттин аймагына кире албаганына байланыштуу мүлктү кабыл ала элек", - деп билдиришти башкармалыктан.
Атамбаевдин адвокаттары менен жакындары соттун чечими жок экенин айтып келет.
Алмазбек Атамбаев 14-февралда абактан чыгып, Кой-Таштагы үйүнө келген. Ал жерден журналисттерге маалымат жыйынын куруп, соттун чечими менен үй өз менчигинде калганын айткан. (ZKo)
Facebook шеринеси