Линктер

ЧУКУЛ КАБАР!
19-Апрель, 2024-жыл, жума, Бишкек убактысы 02:51

"Бешинчи канал" жана "Пирамида" каналдарын жоюу боюнча иш башталды


5-канал
5-канал

Мамлекеттик мүлктү башкаруу боюнча фонду "Бешинчи канал" жана "Пирамида" каналдарын жоюу боюнча иштер башталганын билдирди. Бул маалыматты аталган мекеменин өкүлдөрү "Азаттыкка" ырастап, 4-апрелде эки каналга кат жөнөтүлгөнүн билдиришти.

Телеканалдарды жоюунун себеби жана анын мүлктөрү боюнча маалымат айтылган жок.

3-апрелде Маданият, маалымат, спорт жана жаштар саясаты министринин орун басары Чынгыз Эсенгул уулу Жогорку Кеңештин тармактык комитетинде депутаттын суроосуна жооп берип жаты, эки канал банкрот болгонуна байланыштуу жоюлуп жатканын айткан. Ал "Бешинчи канал" менен "Пирамиданы" Бишкек мэриясына жана "Кыргызалтынга" берүү аракеттери ишке ашпай калганын билдирген.

Мунун алдында мамлекеттик "Бешинчи каналдын" эмгек жамааты президент Садыр Жапаровго кайрылуу жолдоп, телеканалдын маселесин чечип берүүнү өтүнгөн.

3-апрелде "Бешинчи каналдын" YouTube баракчасына жарыяланган видеодо кызматкерлер төрт айдан бери жумушсуз отурганын, аларга алдыда кандай өзгөрүүлөр болору тууралуу маалымат берилбегенин айтышкан.

Мамлекеттик мүлктү башкаруу фондунун ошол кездеги жетекчиси Мирлан Бакиров 20-февралда акционердик коомго айландырыла турган мамлекеттик ишканаларды атап, алардын арасында “Бешинчи канал” да бар экенин маалымдаган.

Кыргызстанда төрт мамлекеттик телерадиоканал бар - КТРК, ЭлТР, "Пирамида", "Бешинчи канал". Аларда жүздөгөн кызматкер эмгектенет. Жогорку Кеңештин айрым депутаттары мамлекеттик телеканалдарды менчикке өткөрүү маселесин көтөрүп келет. (КЕ)

Facebook шеринеси

XS
SM
MD
LG