15 жыл чет жакта качып жүргөн Тайланддын мурдагы премьер-министри Таксин Чинават 22-августта мекенине кайтып келери менен камалды.
74 жаштагы миллиардерди жүздөгөн тарапташы аэропортто тосуп алышты.
Таксин 2001-жылы өкмөт башчылыкка келген. 2006-жылы ал аскердик төңкөрүштүн жыйынтыгында бийликтен кулатылып, өлкөдөн чыгып кеткен.
Ал коррупцияга, кызматынан кыянат пайдаланууга айыпталып, 2008-жылы сыртынан сегиз жылга кесилген.
Кийин өкмөт башына анын карындашы Йинглак Чинават келген. Ал дагы 2014-жылы өлкөдө бийликке каршы күчөп жаткан нааразылык акциялардан улам кызматтан кеткен.
Саясат талдоочулар Таксин Чинават жаш курагына байланыштуу бийликтен ырайым берүүнү же шарттуу түрдө бошотууну суранарын боолгоп жатышат.
