БУУ Газадагы соңку трагедиялуу окуяны кылдат иликтөөгө чакырды. 29-февралда Газа шаарында гуманитардык жардам алууга келген 100дөн ашуун адам набыт болуп, ондогон киши жараат алды. Москвада миңдеген киши оппозиционер саясатчы Алексей Навальныйды акыркы сапарга узатты. Бишкек мэриясы 60тан ашык үй-бүлөнү "мыйзамсыз жашап жатат" деген жүйө менен жаңы салынган имараттан чыгара баштады. Көп кабаттуу имаратта жарык жана суу өчүрүлдү. Экс-бажычы Райымбек Матараимов менен мамилеси бар делген депутат Шайлообек Атазов “өлкөдөн шашылыш чыгып кетти" деген кабарды төгүндөдү. Ал Түркияда дарыланып жүргөнүн, жакында Кыргызстанга кайтып келээрин билдирди.