Бишкектин Чүй жана Гоголь көчөлөрүнүн кесилишинде жол кырсыгы катталып, кырсыктаган унаалардын бири жөө жүргүнчүлөрдүн жолуна чыгып кеткен. Ошол учурда тротуарда бара жаткан жарандарды тебелеп кетип, беш адам жабыркады. Алардын арасында жаш балдар бар экени да кабарланды.
Окуя кечээ, 15-август күнү түштөн кийин катталган. Социалдык тармактарга тараган видеолордо Чүй көчөсүнөн катуу ылдамдыкта келе жаткан "Мерседес-Бенц" менен "Хонда CR-V" үлгүсүндөгү унаа сүзүшкөн. Жол кайгуул кызматы берген маалыматта жолдо бара жаткан үч адам, "Мерседестин" айдоочусу менен жүргүнчүсү жаракат алганы айтылат.
“Жабыркагандардын бардыгын окуя болгон жерде тез жардам кызматы ооруканага алып кеткен. Учурда жол-транспорт кырсыгынын бардык жагдайлары жана келип чыгуу себептери такталууда”, – деп айтылат Милициянын кайгуул кызмат башкармалыгынын басма сөз кызматы тараткан маалыматта.
ИИМ Кыргызстандын аймагында массалык адам өлүмү менен коштолгон жол кырсыктары мас абалда унаа башкаруудан, карама-каршы тилкеге чыгуудан, белгиленген ылдамдыктан ашырып айдагандан келип чыгарын билдирүүдө.
Кыргызстанда акыркы жылдары жол кырсыктары көп катталууда. Расмий маалымат боюнча, 2025-жылы Кыргызстанда 8 456 жол кырсыгы болуп, андан 900 киши каза тапкан. Дагы 12 миң 169 адам ар кандай жаракат алган. Кырсыктарга автоунааны катуу айдоо, каршы тилкеге чыгуу, ичимдик ичип рулга отуруу жана айрым автожолдордун талапка жооп бербегени негизги себеп экени айтылып келет. (DSH)
Шерине