Кыргыз-кытай чек арасындагы “Бедел” өткөрмө пункту аркылуу чек ара аймагынан өтүүчү Үзөңгү-Кууш суусуна автоунаа көпүрөсүн куруу жөнүндө макулдашууга кол коюлду.
Бул тууралуу президенттин администрациясы кабарлады.
Президент Садыр Жапаров менен Кытайдын лидери Си Цзинпиндин 31-августта, "Ынтымак Ордодо" жолугуп, бир сааттан ашык сүйлөштү.
Жолугушууда Кыргызстан менен Кытайдын ортосундагы “Бедел” өткөрмө пунктун өнүктүрүүгө жана “Барскоон – Бедел” автоунаа жолун курууга көңүл бурулгану белгилүү болду.
"Бул стратегиялык долбоорлорду ишке ашыруу Кыргызстандын транзиттик потенциалын кыйла бекемдеп, транспорттук өз ара байланыштуулукту кеңейтип, Кытай менен Борбор Азиянын ортосунда жаңы транспорттук-логистикалык коридорду түзөрү белгиленди", - деп билдирди президенттин администрациясы.
Барскоон – Бедел автоунаа жолунун жалпы узундугу болжол менен 150 чакырым. Андагы курулуш иштери 2025-жылдын 26-августунда башталган. Долбоорду ишке ашыруу мөөнөтү беш жыл. Планга ылайык, жолду 2030-жылы толук пайдаланууга берүү пландалууда.
Быйыл апрель айында Транспорт жана коммуникациялар министрлигине караштуу "Барскоон – Бедел автомобиль жолун куруу боюнча мамлекеттик дирекция" мекемеси түзүлгөн.
Дирекция Барскоон – Бедел автоунаа жолун куруу долбоорун жалпы башкарып, ишке ашырууну координациялайт, каржылык каражаттардын натыйжалуу пайдаланылышын камсыз кылат жана социалдык, экологиялык, техникалык талаптардын сакталышын көзөмөлдөйт. (ST)
Шерине