Максат Асаналиев Улуттук коопсуздук боюнча мамлекеттик комитеттин (УКМК) төрагасы болуп дайындалды. Тиешелүү жарлыкка президент Садыр Жапаров кол койду. Ал буга чейин УКМКнын төрагасынын милдетин убактылуу аткарып келаткан жана Жогорку Кеңеш 2-сентябрда аны атайын кызматтын жетекчилигине дайындоого макулдук берген.
Камчыбек Ташиев февраль айында УКМКнын төрагасы кызматынан бошотулгандан кийин, анын ордуна Жумгалбек Шабданбеков келген. Садыр Жапаров аны 30-июнда кызматтан алып, “Ынтымак ордо” мунун себебин Жумгалбек Шабданбеков башка кызматка өткөнү менен түшүндүрүп, кайсы ишке барганын тактаган эмес.
48 жаштагы Максат Асаналиев Ысык-Көл облусунун Тоң районунда туулган. 2000-жылы Жусуп Баласагын атындагы Кыргыз улуттук университетинин юридика факультетин аяктаган.
Эмгек жолун 2001-жылы Улуттук коопсуздук мамлекеттик комитетинде (УКМК) тергөөчү болуудан баштаган жана 2010-жылга чейин улук тергөөчү, өзгөчө маанилүү иштер боюнча тергөөчү болуп иштеген. 2010-жылы Башкы прокуратурага өтүп, өзгөчө маанилүү иштер боюнча тергөөчү болуп 2018-жылга чейин иштеген.
Максат Асаналиев 2018-2019-жылдары Бишкектеги Биринчи май районунун прокурору, кийин Ош облусунун прокурору болуп кызмат кылган. (BTo)
Шерине