АКШдагы 3-ноябрдагы орто мөөнөттүү шайлоонун баштапкы жыйынтыктары Демократиялык партия Конгресстин эки палатасында тең көпчүлүк орунга ээ болушу ыктымал экенин көрсөттү. Америкалык бир катар маалымат каражаттарынын божомолуна караганда, демократтар президент Дональд Трамптын республикачыларынан Сенаттагы жана Өкүлдөр палатасындагы көзөмөлдү өз колуна алышы мүмкүн.
Мындай жыйынтык Конгресстеги күчтөрдүн балансын өзгөртүп, демократтарга федералдык чыгымдарды көзөмөлдөөдө, администрациянын ишин иликтөөдө жана мыйзам чыгаруу жараянында көбүрөөк таасир берери айтылууда.
The New York Times басылмасынын маалыматына караганда, Дональд Трамп шайлоонун жыйынтыгын кабыл алууга жана демократтар менен кызматташууга даяр экенин билдирген.
Ошол эле учурда президент тышкы саясат жана аскердик операциялар боюнча кеңири ыйгарым укуктарын сактап калат. Мындан улам эксперттер Конгресстеги өзгөрүүлөрдүн баары эле дароо саясаттагы өзгөрүүгө алып келбеши мүмкүн экенин белгилеп жатышат.
Шайлоо АКШ менен Израилдин Иранга каршы аскердик өнөктүгү уланып, Орусиянын Украинага каршы согушу дагы деле токтобой турган учурда өттү. Демократтар шайлоо өнөктүгү маалында Иран менен жаңжалдан чыгуу жана аскердик чыгымдарды көзөмөлдөө убадасын беришкен.
Серепчилердин пикиринде, Конгрессте жаңы күчтөрдүн жайгашуусу Ак үйгө Иран боюнча дипломатиялык жол издөө үчүн кошумча басым жаратышы мүмкүн. Ошондой эле Украинага жардам көрсөтүү, Орусияга каршы санкциялар жана Пентагондун чыгымдары боюнча талкуу күчөшү мүмкүн экени болжолдонууда.
Эгер демократтардын жеңиши ырасталса, партиянын өкүлү Чак Шумер 2027-жылы Сенаттагы көпчүлүктүн лидери кызматын кайра аркалашы күтүлүүдө.
Шерине