5-апрелде “Фукусима Дайичи” өзөктүк кубат ишканасында (АЭС) радиоактивдүү сууларды тазалоо үчүн булганч суулар деңизге агызыла баштады. Жапон маалымат булактарынын кабарлашынча, курамында нормадан 100 эсе көп радиоактивдүү заты бар 11 500 тонна суу деңизге агызылат.
Бүгүн Жапония бийликтери түндүк чыгыштагы “Фукусима Дайичи” ишканасынын аймагында бала бакчалар менен мектептердеги радиациянын деңгээлин текшере баштады. 11-марттагы жер титирөө жана цунамиде зыян тарткан өзөктүк кубат ишканасынан радиация ашыкча көп бөлүндү деген чочулоодон улам эки күндө 1400дөй мектеп текшерилип чыгат.
