Арменияда Кассациялык сот 7-ноябрда мурдагы президент Роберт Кочаряндын баш коргоо чарасын өзгөртүү тууралуу анын адвокаттарынын арызын канааттандырган жок.
Роберт Кочорян алгач 2018-жылдын аягында камакка алынган. Быйыл май айында Еревандагы сот экс-президентти үй камагына чыгарган. Сотто Тоолуу-Карабактын азыркы жана мурдагы башчылары 2 миң доллар күрөө коюп, тилкат жазып беришкен.
Бирок бир айдан кийин эле апелляциялык сот Кочаряндын бөгөт чарасын өзгөртүп, аны кайра камакка алуу тууралуу чечим чыгарган.
Роберт Кочарян Арменияны 1998-2008-жылдары башкарган. Ал «конституциялык түзүлүштү кулатууга аракет кылган, ири суммада пара алган» деп айыпталып жатат. Экс-президент Арменияда нааразылык акциясына чыккандардын кууп таратылышы боюнча күнөөлөнүүдө. Анда кеминде сегиз адам өлгөн.
Кочарян өзүнө каршы соттук ишти «мыйзамсыздык» жана учурдагы премьер-министр Никол Пашиняндын «саясий куугунтугу» катары мүнөздөгөн.
Эгерде сот Кочарянды күнөөлүү деп тапса, ал 15 жылга эркинен ажыратылышы мүмкүн.
