28-августта улуттук филармонияда “Кош жылдыз” аттуу долбоор өтөт. Бишкекте автордук тасмалардын 2- фестивалы башталды.
- Жаш киноишмерлерди колдоо максатын аркалаган бул иш-чаранын алкагында Борбор Азия өлкөлөрүнүн жаңы тартылган мыкты фильмдери жана жаш кинорежиссерлор жараткан тасмалар тартууланат. Ошондой эле четтен келген киноишмерлердин катышуусунда баарлашуу, талкуулар жүрүп, устаттык сабактар өтүлөт.
- 28-августта улуттук филармонияда “Кош жылдыз” аттуу долбоор өтөт. Ага кыргыз элинин белгилүү инсандары катышып, кыргыз эстрада жылдыздары менен сахнада дует ырдашаарын кабарлады долбоордун жетекчиси Тамара Жаманбаева:
- - Мисалы, Жогорку кеңештин депутаттары Чолпон Баекова Сыймык Бейшекеев менен, Галина Куликова Алтынбек Сапаралиев, Айнура Кенжебаева Расул Маматкулов менен, Бегаалы Наркозуев Жайнагүл Калчаева менен ырдашат. Баардыгы болуп концертке 14 түгөй катышат.
- Өткөн жумада башталган “Эгемен Кыргызстандын мыкты фильмдери” аттуу декада бул жумада да уланат. Иш-чара 29-августка чейин созулуп, бул убакыт аралыгында кыска жана толук метраждуу, ошондой эле анимациялык фильмдер көрсөтүлөт деп билдирди "Азаттыка" берген маегинде Кыргызкино департаментинин жетекчиси Абибила Пазылов.
- 28-29-август күндөрү Кожомкул атындагы спорт ордосунда бир катар эстрада ырчыларынын катышуусунда “Салам Бишкек” аттуу концерт өтөт. Ал эми 30-август күнү улуттук опера жана балет театрында белгилүү орус куудул айымы Елена Воробей өзүнүн театры менен келип концерт берет.
- 29-августта Кыргыз циркинде Кремль циркинин оюн-зоогу башталат. Бул туурасында Кыргыз циркинин жетекчисинин орун басары Кадыр Таджиев кабарлады. Анын айтуусунда программада маскарапоздордун оюндары өзгөчө.
- 30-31-августта Бишкекте ырчы Сьездбек Искеналиевдин жеке концерти өтөт. Концертти Динара Акулова баштаган бир катар ырчылар коштойт.
