Уланбек Эгизбаев атындагы сыйлыктын жеңүүчүлөрү.
Жыпаргүл Сариева, Уланбек Эгизбаевдин апасы: Уланымдын ишин жаштар, журналисттер улантып жатат
“Фонд уюшулгандан бери жакшы иш жүрүп жатат. Быйыл төртүнчү ирет сыйлык тапшырылып жатат. Жылдан-жылга иликтөөчү журналисттердин көбөйүп жатышы бизди кубандырат. Былтыр кырк иш келсе, быйыл 100гө жакындады. Бул да болсо өлкөбүздүн өсүшүнө, өнүгүшүнө салым кошот деп ишенем. Уланымдын каалаганы, көздөгөнү жалаң ушул болчу. Ошол иштин баары аткарылып, анын ишин жаштар, журналисттер улантып келе жатканы бизди - үй-бүлөсүн кубандырат”.
Венера Жуматаева: кыргыз коомун тазалап, агарта турган материалдар көбөйө берет
“Бул жерде баары айтышты, жылдан жылга сынакка берилген иликтөө материалдары көбөйүп жатат. Саны эле эмес, сапаты дагы жогорулады. Сыйлык алыш, жеңиш кыйын болуп баратканын өзүбүз дагы сезип жатабыз. Кыргыз коомун тазалап, агарта турган, акыйкаттык, адилеттик үчүн даярдалган материалдар көбөйө берет. Сапаты, кесипкөйлүгү да жакшыра берет деп ишенебиз”
Султан Каназаров: материалдардын саны дагы, сапаты дагы өстү
“Сөз эркиндигине басым күчөгөн сайын журналистикалык иликтөөлөрдүн сапаты да, саны дагы өскөнү бизди кубандырат. Кызыгуу дагы, жыйынтыктар дагы, бийликтин журналистикалык иликтөөлөргө реакция кылганы дагы бизди сүйүндүрөт. Менимче төрт жылдагы динамика абдан жакшы”.
Facebook шеринеси