Коронавируска каршы ыкчам штабдын маалымдашынча, 19-июль, саат 17:30га карата Кыргызстанда COVID-19 жана пневмонияга 1020 адам кабылганы аныкталды.
Анын ичинде: Бишкек шаарында - 369
Ош шаарында – 151
Чүй облусунда – 123
Ош облусунда - 178
Талас облусунда – 37
Нарын облусунда – 31
Ысык-Көл облусунда – 31
Жалал-Абад облусунда – 40
Баткен облусунда - 70
Ушуну менен март айынан бери Кыргызстанда коронавируска жана пневмонияга кабылган адамдардын жалпы саны 26 532 болду.
Акыркы суткада коронавирустан жана пневмониядан 70 киши көз жумду. Бул илдеттерден каза болгондордун саны 1003 адамга жетти.
Республикалык штаб 19-июлга карата өлкөдөгү эпидемиологиялык кырдаал тууралуу маалыматтардын кечиктирилип берилишин Саламаттык сактоо министрлиги статистиканы тактаганы менен түшүндүрдү.
Ирандын президенти Хасан Роухани 18-июль күнү Тегеранда жасаган билдирүүсүндө өлкөдө коронавирус жуктургандардын саны 25 миллион адамдын тегерегинде экенин айтты.
Саламаттык сактоо министрлиги жүргүзгөн изилдөөгө таянган Роухани пандемия башталгандан бери Иранда 14 миңдей киши каза болгонун айтып, жаңы вирусту олуттуу коркунуч катары кабыл алууга үндөдү.
81 миллион калктуу өлкөдө ушу тапта 200 миңден ашуун адам ооруканаларга кайрылганы, бул сан жакынкы айларда эки эсе көбөйүшү, бардыгы 30-35 миллиондой адам коронавирус жуктурушу мүмкүн деп күтүлүп жатканын белгилеген Хасан Роухани калкты оорудан сактануу чараларын көрүүгө чакырды.
Ирандын парламенти жарыялаган мурунку баяндамада вирустун жайылышына догдурлар колдонуп жаткан тесттердин ишеничсиз сапаты себеп болуп жатканы белгиленген.
19-июлга карата коронавирус пандемиясынын статистикасы:
Дүйнөдө коронавирус жуктургандардын жалпы саны: 14 426 150
Көз жумгандардын саны: 604 917
Сакайып кеткендердин саны: 8 612 333
59 921 адам оор абалда.
Жон Хопкинс университети дүйнөдөгү мамлекеттердин өкмөттөрү берген маалыматтарга таянуу менен 18-июлда коронавирусту жугузуп алгандардын саны 14 миллиондон ашканын кабарлады.
Пандемиянын курмандыктары расмий маалымат боюнча 600 миң адамга жетти.
ДССУ соңку кезде вирус тездик менен тарай баштаганын билдирди. Акыркы суткада дүйнө жүзүндө 237 740 адамга вирус жукканы белгилүү болду.
Инфекцияны алып жүрүүчүлөрдүн 3 миллиону АКШда, 2 миллиону Бразилияда, 1 миллиону Индияда.