Чоң Кемин өрөөнүндөгү Шабдан айылы бир жылдары “Новая Россия” деп аталып, анын калкынын 80% орустар түзгөн. Ушул тапта бул чакан айылда кыргыздар менен жуурулушуп калган он чакты орус үй-бүлө жашайт. Алардын көбү кыргызча эркин сүйлөп, дыйканчылык, мал чарбасы менен күн көрөт. Бойго жеткен уландары кенедей кезден ат үстүндө чоңоюп, айылдын курама тобунда улак тартышат.