Орусиянын армиясы 29-октябрда күндүз Украинанын Днепр шаарында темир жол бекетине сокку уруп, 13 адам каза болду. Бул тууралуу Днепр облустук аскердик администрациянын башчысы Александр Ганжа билдирди.
Анын айтымында, кеминде 10дон ашуун киши жаракат алды.
Днепрдин мэри Борис Филатовдун маалыматына караганда, сокку жүргүнчүлөрдүн ылдам жүрүүчү поездине тийген.
"Көп адам каза болду. Жарадарлар абдан көп", - деп жазды ал.
Жеринде тиешелүү кызматтар иштеп жатат.
Украинанын темир жол компаниясынын маалыматына караганда, реактивдүү дрон № 866 Днепр – Запорожье багытындагы поезд турган платформаларынын бирине тийген.
Орусия 29-октябрга караган түнү Украинага 112 дрон менен чабуул койгон. Украинанын Аскер-аба күчтөрүнүн маалыматына ылайык, чабуул 28-октябрдын кечинде башталган. Дрондор Орёл шаарынан, Ростов облусундагы Миллероводон жана Орусия көзөмөлдөгөн Донецкиден учурулган.
Жалпысынан жети жерде сокку тийген учурлар катталып, дагы беш жерде дрондордун сыныктары кулаган.
Ровно облусунун Сарны районунда орусиялык дрон жарандык ишканага тийди. Облустук аскердик администрациянын башчысы Александр Ковалдын айтымында, анын кесепетинен бир адам каза болуп, ишкананын аймагында өрт чыккан.
Түнү Днепр шаарында дрондун соккусунан бир ишканага зыян келтирилген, 35 жаштагы жергиликтүү тургун жаракат алды. Днепропетровск облустук аскердик администрациясы Никопол районунда административдик имарат, инфраструктура объектиси жана көп кабаттуу турак үйгө, Синельников районунда жүк ташуучу машинеге зыян келтирилгенин билдирген.
Харьков шаарында дрондор бир нече районго сокку урган. Шаар мэри Игор Тереховдун айтымында, түнкү саат 03:00 чамасында Холодногорск районуна сокку тийип, өрт чыккан. Кийинчерээк дрон Салтов районундагы билим берүү мекемесинин имаратына тийген. Эртең менен Индустриалдык районго да дрондордун чабуулу болгону кабарланган.
Украинанын Орусия басып алган Олешки шаарында ок атышууларды токтотуу режими бузулбай сакталып жатат.
Мындай маалыматты Орусиянын акыйкатчысы Яна Лантратова билдирди.
Украинанын омбудсмени Дмитрий Лубинец да Олешкиде жымжырттык режими эреже бузуусуз уланып жатканын кабарлады.
"Тараптар өздөрүнө алган милдеттерди толук аткарып жатышат. Бир дагы эреже бузуу катталган жок", — деп жазды Лантратова соцтармактагы баракчаларына.
Лубинец болсо 30-октябрда шаарга гуманитардык жүк жеткирүү пландалып жатканын айтты.
Украинанын Херсон облусуна караган Олешки калаасында ок атышууларды токтотуу режими 27-октябрда Москва убактысы боюнча түнкү саат 03:00дөн тарта башталган.
Макулдашууга АКШнын биринчи айымы Мелания Трамп жана Рим папасы Леон XIVнин ортомчулугу менен жетишилген.
Мелания Трамптын айтымында, Олешкиге америкалык Newsmax телеканалынын төрт журналисти жөнөп кеткен, алар "көз карандысыз" байкоочу катары кырдаалга байкоо салышат. Тынчтык режими 1-ноябрга чейин уланары күтүлүп жатат.
Олешкини орус аскерлери 2022-жылдын февраль айынын аягында, Украинага кеңири масштабдагы басып киргенден кийин басып алган. Шаар азыр Орусиянын көзөмөлүндө.
Орусиянын башкалаасы Москванын мэри Сергей Собянин 29-октябрга караган түнү Москваны көздөй 600дөн ашуун дрон учурулуп, анын 231и атып түшүрүлгөнүн билдирди.
Жабыркагандар жана зыян тууралуу маалымат жок. Москванын аэропорттору ишин токтотту.
Башкырстандагы Стерлитамак шаарында дрон соккусунан Башкыр сода компаниясында (БСК) өрт чыкканын Телеграмдагы Astra каналы жазды.
Аталган ишканага сокку болгонун Старлитамактын мэри Эмил Шаймарданов бышыктады.
Курск облусунун губернатору Александр Хинштейн аймакта дрон соккуларынан беш киши жабыркаганын, келтирилген зыяндар бар экенин маалымдады.
Перм крайында аба коркунучу тууралуу эскертүүлөр болгону тууралуу маалымат түштү.
Орусиянын Коргоо министрлиги түн ичинде Орусиянын 19 аймагынан 1214 украиналык учкучсуз учак жок кылынганын жарыялады. Согуш шартында тараптардын маалыматтарын көз карандысыз булактардан тактоо мүмкүн болбой турат.
Орусиянын армиясы Украинага негизсиз кол салган 2022-жылдын февралынан өлкөнү күн сайын аткылап келет. Далилдерге карабай Москва Украинанын жарандык жайларына сокку уруп, миңдеген кишинин канына забын болуп жатканын моюнга албайт.
Согуш башталганы Украинада бейкүнөө өлгөн кишилер, жараат алгандар миңдеп саналат. Миңдеген киши үй-жайын таштап кетүүгө аргасыз болду. Миңдеген киши жакындарын жоготуп, миңдеген бала жетим калды. Украинанын шаар-кыштактары, инфраструктурасы талкаланды. Киев өзүнө кол салууга жооп иретинде, Орусиянын мунай заводдорун жана башка армияны каржылаган объектилерине сокку уруп келатат. Украин тарап мунай жайларына чабуулдарын быйыл жаздан тарта күчөтүп, Орусиянын өзүндө эле эмес, андан кара май алган өлкөлөрдө да кризис пайда болду. Чабуулдарда Орусияда да киши өмүрү кыйылган учурлар бар.
Улуу Британия Украинага кошумча 10 миллиард фунт стерлинг өлчөмүндө колдоо көрсөтөт. Бул тууралуу Украинанын президенти Владимир Зеленский 28-октябрда Британиянын премьер-министри Энди Бернхэм менен телефон аркылуу сүйлөшкөндөн кийин билдирди.
Зеленскийдин айтымында, анын 7 миллиард фунт стерлинги Украинанын экономикасын колдоого жумшалат. Дагы 3 миллиард фунт стерлинг Британиянын экспорттук каржылоосу болот, негизинен курал-жарак сатып алууга пайдаланылышы пландалууда.
Украинанын президенти бул чечим өз убагында кабыл алынганын белгилеп, Орусия Украина өнөктөштөрүнүн колдоосун ала берерин түшүнүшү керектигин айтты. Анын пикиринде, Украинанын коргонуу жана башка мүмкүнчүлүктөрүн бекемдөө Москваны согушту токтотууга түрткү бериши керек.
Британия өкмөтүнүн 13-октябрда жаңыртылган маалыматына ылайык, кошумча жардам жарыяланганга чейин Лондондун Украинага көрсөткөн колдоосунун жалпы көлөмү болжол менен 25 миллиард фунт стерлингди түзгөн.
Бул суммага 16 миллиард фунт стерлинг аскердик жардам, 5,6 миллиард фунт стерлингге чейинки аскердик эмес жардам жана 3,5 миллиард фунт стерлинг өлчөмүндөгү экспорттук каржылоо лимити кирет. Британия 2030–2031-жыла чейин жана зарылчылык болсо андан ары да Украинага жыл сайын 3 миллиард фунт стерлинг аскердик жардам бөлүүгө милдеттенген.
Британия өкмөтү 13-октябрда Украинага кошумча санкцияларды, аскердик жана каржылык жардамды даярдап жатканын билдирген. Бул маалымат Лондондо Энди Бернхэм менен Владимир Зеленскийдин жолугушуусунун алдында жарыяланган.
Британиянын артыкчылыктуу багыттарынын бири - Орусиянын аба чабуулдарынан коргонуу үчүн зениттик ракеталарды жеткирүүнү тездетүү. Ошол кезде өкмөт 45 миллион фунт стерлингдик ракета жеткирилерин билдирип, кыш башталганга чейин курал-жаракты өткөрүп берүүнү тездетүү ниетин маалымдаган.