Май айында күчүнө кирген жаңы Конституцияга ылайык, Жогорку Кеңештин саны да, салмагы да өзгөрдү. Жаңы чакырылыштын кандай ыйгарым укуктары болот? Мурдагыга салыштырмалуу кандай айырмачылыктар бар? “Азаттыктын” түшүндүрмө видеосун көрүңүз.
Жогорку Кеңешке шайлоону уюштурууга бюджеттен 592 миллион 531 миң сом кетти. Бул тууралуу Борбордук шайлоо комиссиясы билдирди.
Шайлоодо ат салышып жаткан 21 партиянын шайлоо фондуна 221 миллион 343 миң 406 сом түшүп, анын 200 млн. 671 миң 564 сому сарпталды.
Бир мандаттуу округдардагы талапкерлердин фондуна 253 миллион. 188 миң 663 сом түшүп, анын 201 миллион. 857 миң 97 сому коротулду.
28-ноябрда депутаттар партиялык тизме жана бир мандаттуу округдардан шайланып келет.
Кыргызстанда бир мандаттуулар үчүн 36 шайлоо округу уюштурулду. БШК чет өлкөлөрдө 45 шайлоо участогу уюштурулганын билдирди.
Кайсы талапкер, кайсы саясий партиянын тизмесинде шайлоого катышып жатканын билгиңиз келсе бул жерди басыңыз. Баса, интерактивдүү карта компьютерден гана көрүүгө ылайыкталган.
Кыргызстандын президенти Садыр Жапаров 28-ноябрда Түркмөнстанга жумушчу сапар менен барат. Ал жакта Экономикалык кызматташтык уюмунун (ЭКУ) 15-саммитине катышат. Ушул эле күнү Бишкекке кайтып келерин президенттик администрациядан билдиришти.
Кыргызстандын Жогорку Кеңешине ат салышып жаткан партиялардын тизмесинде талапкерлердин 36% аялдар, 63% эркектер түзөт. Бул тууралуу Борбордук шайлоо комиссиясынын (БШК) төрайымы Нуржан Шайлдабекова Коопсуздук кеңешинин 26-ноябрдагы жыйынында билдирди.
Бир мандаттуу округдардан катышып жаткан талапкерлердин арасында аялдар 10% жетпейт.
Майыптыгы бар талапкерлер 4,5%, этникалык топтордон 18,4%, 35 жашка чейинкилер 25% түзөт.
Шайлоо мыйзамдарына ылайык, партиялардын тизмесинде гендердик, аймактык, курагына социалдык тобуна байланыштуу баланс сакталууга тийиш.
Facebook шеринеси