Москвада кыргыздардын курултайы өттү

Москвадагы кыргыз курултайында көчмөн элдердин дүйнөлүк спорт оюндарынын презентациясы болду. Бул оюндар Ысык-Көлдүн жээгинде өтөөрү, ага түрк тилдүү мамлекеттер, көчмөн элдердин өкүлдөрү катыша тургандыгы айтылды.

Уюштуруучулардын айтымында, Дискавери телеканалы көчмөндөрдүн спорт оюндарына улуттук костюмчан 18 миң адам катышса, жаңы рекорд болорун жана телеканал бул трансляцияны сатып алууга кызыкдар экенин билдирген.

Уюштуруучулар көчмөндөрдүн спорт оюндары 21-кылымдын глобалдуу спорт трендине айланышы мүмкүн деп ишенишет.
 

Курултайдын катышуучулары түштөнүүгө чыкканда мурдагы акыйкатчы Турсунбек Акун бата тиледи.
 

Курултайга келген Борбор Азиядагы Адам укуктары кеңешинин координатору Турсунбек Акун мигранттардын социалдык жана укуктук проблемаларын талкуулоону, айрыкча соттолгон мигранттардын маселелерин чечүү жолдорун сунуштады.

Муну менен катар Акун “Бүгүн дүйнө жүзүнөн чогулган кыргызстандыктардын курултайына жок дегенде вице-премьер келиши керек эле” деп кыргыз өкмөтүн сындады. "5 вице-премьердин бири келип, көтөрүлгөн маселелерди өкмөткө жеткирсе болмок", - дейт Турсунбек Акун.

Курултайда Жакынкы Чыгыштагы кыргызстандыктардын өкүлү Марс Орозов Араб өлкөлөрүндөгү кыргызстандыктардын акыбалы жөнүндө сөз сүйлөдү. “Чет өлкөдө иштеп жүргөн кыргызстандыктар эмгегин Кыргызстанда жасаса болмок, бирок алар кийин тажрыйбасын мекендин керегине жаратат” деди.

Марс Орозов Жакынкы Чыгышта иштеп жүргөн кыргызстандыктар ак эмгеги аркылуу Кыргызстанды таанытып жатканын да кошумчалай кетти.