Баткендеги Мадыген аймагы палеонтологиялык мурас катары дүйнөлүк баалуулуктар тизмесине киргизилди.
Бул тууралуу Жаратылыш ресурстары, экология жана техникалык көзөмөл министрлиги билдирди.
Мекеменин маалыматында, "Мадыген: дүйнөлүк маанидеги палеонтологиялык кенч" аттуу эл аралык симпозиуму өткөн.
"Мадыген өткөн доорлордун изин сактаган жаратылыштын тарыхый китеби катары каралып, дүйнөлүк палеонтологиядагы орду, аймактын уникалдуу табигый мурасын сактоо жана эл аралык илимий кызматташтыкты өнүктүрүү маселелери талкууланды", - деп жазылган министрлик тараткан маалыматта.
Баткен облусунун аймагындагы Мадыген тоолорунда палеонтология жана геологиялык изилдөөлөр жүрүп келет.
Мадыген - байыркы дүйнөнүн архиви
Изилдөөлөрдүн негизинде геопарктан миллиондогон жылдар мурда жашаган жаныбарлардын жана өсүмдүктөрдүн байыркы калдыктары, ташка айланган издери жана сөөктөрү табылган.
Алардын ичинен эң белгилүүсү - болжол менен 225 миллион жыл мурда жашаган Sharovipteryx mirabilis. Сойлоп жүрүүчүлөр түркүмүнө кирген бул жаныбардын арткы буттарынын ортосунда абада калкып учууга мүмкүндүк берген кабыкча жайгашкан. Изилдөөчүлөр аны дельта сымал калкып учуучу канаты бар биринчи белгилүү жаныбар деп аташкан.
Изилденген тоо тектеринин бир бөлүгүнүн курагы болжол менен 237 миллион жылды түзөт. 2026-жылы палеонтологдор байыркы жыгачтын көмүргө айланган калдыктарын таап, Пангеянын бул бөлүгүндө триас мезгилинде табигый өрттөр болгон деп болжолдошкон.
Министрлер кабинети 2023-жылдын 18-апрелинде Мадыгенге мамлекеттик жаратылыш эстелиги статусун берген. Корголуучу аймак 8,16 миң гектарды ээлейт.
Мадыген азырынча ЮНЕСКОнун глобалдык геопаркы статусуна ээ боло элек. Уюмдун сайтында ал ушундай статуска талапкер аймак катары аталат. (ST)