"Супара Чункурчак" этно-комплексинде 4-ноябрдын түнү өрт чыкты.
Өзгөчө кырдаалдар министрлигинин кызматкерлери, техника барып, өрттү өчүрүү аракети көрүлүп жатканы кабарланды.
Этно-комплекстеги өрт тууралуу күбөлөрдүн видеолору социалдык тармактарга тарады. Андан комплекстеги жайлардын бири жалбырттап катуу күйүп жатканын көрүүгө болот.
"Супара Чуңкурчак" өрткө байланыштуу маалымат бере элек. Этно-комплекс Бишкектен 40 чакырым түштүктө, Чуңкурчак капчыгайында, токойдун жанында, деңиз деңгээлинен 2150 метр бийиктикте жайгашкан этно-резорт жана эс алуу борбору.
Аны белгилүү ишкер, маркум Табылды Эгембердиев негиздеген. Анда көчмөн маданиятын чагылдырган өзгөчө боз үйлөр, "Бешик" отелдери, үч кабаттуу улуттук ресторан жана башка жайлар бар.