Иранда Нооруз майрамы белгиленээр алдында «Чек арасыз кабарчылар» (RSF) укук коргоо уюму расмий Тегеранды абакта жаткан 21 журналистти бул майрамдын урматына бошотууга чакырды.
«Алардын жалгыз кылмышы - өз милдетин так аткарып, маалыматтарды жеткирип турганы болгон», - деп айтылат уюмдун билдирүүсүндө.
«Чек арасыз кабарчылар» уюму бийликтерди ирандыктардын эң башкы майрамы саналган ноорузду белгилөө күндөрү абактагы журналисттерди эркиндикке чыгарып, үй-бүлөлөрү менен майрамды чогуу тосуусуна шарт түзүүгө чакырды.
Дагы караңыз Иран оппозициячыл журналистти өлүм жазасына тарттыИран абактагы журналисттердин саны боюнча дүйнөдөгү алдыңкы орунда турат. «Чек арасыз кабарчылар» уюму 2020-жыл үчүн жарыялаган сөз эркиндигинин көрсөткүчү боюнча Иран 180 өлкөнүн ичинен 173-орунду ээлеген.
Коронавирус пандемиясы өлкөдөгү журналисттердин турмуш шартын дагы кескин начарлатканы айтылып келет. Ирандагы цензура коронавирус илдетинен өлгөн жана жабыр тарткан кишилердин санын так көрсөтүүгө да маалымат каражаттарына мүмкүндүк бербейт.