ТИКРИТ. Ирактын Коопсуздук күчтөрүнүн аскердик даярдыгына Вашингтон мындан ары көбүрөөк каражат бөлөт. Бул жөнүндө Американын Ирактагы аскерлерин кыдырып жүргөн АКШнын коргоо министринин орун басары Пол Волфовиц билдирди. Бүгүн Волфовиц бийликтен кулатылган диктатор Саддам Хусейиндин туулуп-өскөн жери Тикритте Тигр дайрасындагы аралда жайгашкан копмлексти барып көрдү. Бул чөлкөмдө Ирактын атуулдук коргонуу корпусуна жергиликтүү уландар кабыл алынууда. Алардын көбү аскерге уруу башчыларынын сунушу боюнча жалданып жатат.
