ЖАЛАЛАБАТ: ИСЛАМЧЫЛ КУРАЛДУУ ТОП ЖОК КЫЛЫНДЫ

15-Июль, 2006

Ырыспай Абдраимов, Жалалабат Кыргызстандын Улуттук коопсуздук кызматы өткөргөн операциянын натыйжасында бүгүн Жалалабатта террорчул куралдуу топтун беш адамы жок кылынды. Алар, айрым маалыматтар боюнча, Өзбекстан ислам кыймылынын мүчөлөрү болуп саналган. Куралдуу топту жок кылуу боюнча операцияны Улуттук коопсуздук кызматынын башчысы Бусурманкул Табалдиев жетектеди. Улуттук коопсуздук кызматынын өкүлү Ойталбек Осмоновдун айтымында, операция учурунда Улуттук коопсуздук кызматынын айрым жоокерлери жеңил жарадар болгон. Атайын кызматтардын колундагы маалыматка караганда, жок кылынган топтун Ташкентте жана Бишкектеги Оберон базарында, Ош шаарындагы буга чейин болгон террордук акцияларга катышы бар.

Атайын операция түшкү саат экиден өткөндө башталган. Жалалабат облустук милиция башкармасынын имаратына жакын жерде Калашников автоматы, гранатомет жана гранаттар менен куралданган беш адам жашынып алып, коопсуздук кызматынын «Альфа» бөлүгүнүн жана ИИМге караштуу аскерлерге катуу каршылык көрсөтүшкөн.

Айыгышкан согушуу маалында куралданган беш адам баардыгы тең жок кылынган. «Альфанын» бир жоокери ийнинен жаракат алган, бирок ал анча коркунучтуу эмес.

Куралдуу топту жок кылуу боюнча операцияга Улуттук коопсуздук кызматынын, Ички иштер министрлигинин, Чегара кызматынын аскердик бөлүктөрү катышты.