Линктер

ЧУКУЛ КАБАР!
19-Январь, 2022 шаршемби, Бишкек убактысы 08:00

КУЛОВДУН АЙЛАНАСЫНДАГЫ ТАЛАШ-ТАРТЫШ КЫЗЫДЫ


Феликс Кулов экинчи жолу премьер-министр кызматына көрсөтүлө алабы же жокпу, деген маселе Кыргызстандын парламентинде талкуулана баштады. Бир күн мурда Жогорку Кеңештин Конституциялык мыйзамдуулук жана мамлекеттик түзүлүш боюнча комитети Өкмөт жана регламент жөнүндөгү мыйзамдарга таянып, Ф. Куловду президент экинчи жолу премьер-министр кызматына көрсөтө албайт деген бүтүм чыгарган. Депутаттар комитеттин чечими канчалык мыйзамдуу экендигин териштирип, позициялар эки жакка бөлүнүп ажырап, бул маселе боюнча бейшембиде жашыруун добуш бере турган болду. Депутаттар Куловдун жолун торогон тоскоолдук маселесин карап аткан учурда Жогорку Кеңештин сыртында «Жаңы мезгил» партиясынын элүүдөн ашуун мүчөлөрү Бакиев-Кулов тандемин колдогон акция өткөрүп жатышты. Ал эми парламент имаратынын алды жагында болгон митингиде ХИПИК программасына кирүүгө чакырып аткандыгы үчүн Куловду премьер-министр кызматына өткөрбөө керек деген ураан-талаптар жаңырды.

Феликс Кулов экинчи жолу премьер-министр кызматына көрсөтүлө алабы же жокпу, деген маселе Кыргызстандын парламентинде талкуулана баштаганда, Жогорку Кеңештин күн батыш тарабында «Жаңы мезгил» партиясынын элүүдөн ашык мүчөлөрү Куловдун талапкерлигин колдоо акциясын өткөрүштү. Аталган партиянын лидери Аскарбек Базаркулов митингди өткөрүүнүн негзги максаты Бакиев-Кулов тандемин колдоо экенин айтты.

Ал эми «Жаңы мезгил» партиясынын мүчөсү Рита Сулайманова болсо парламент премьер-министрликке Феликс Куловдун талапкерлигин колдоосу керек деген пикирде.

- Эмне себептен али күнчө жогорку бийликте «портфель» талашуу токтобойт. Ушу Куловду кызматынан алып салса, ордуна башка адам келип Кыргызстанды бир жылдын ичинде оңойбу? Келгиле ушул өкмөттү колдоп коелу. Келгиле, Кулов жетектеген өкмөткө мөөнөттү берели. Эл үчүн иштеп берсин.

«Жаңы мезгил» партиясынын мүчөлөрү "Кулов-Бакиев тандемин колдойбуз!" деп кыйкырып турушту. Алар депутаттарды өлкөдөгү саясий кырдаалды курчутуп, элди ойлобой эле, өздөрүнүн байлыгын арттыруу аракетин көрүп жатышат, деп айыпташты.



Ушул эле учурда Жогорку Кеңештин алдында «Кыргызстанды сактоо патриоттук кыймылы», «Революцияны колдоо», жаштардын «Жебе», ХИПИКке каршы кыймылдарынын отузга чукул мүчөлөрү митинг өткөрүштү. Алар ХИПИК программасына кирүүгө чакырып аткандыгы үчүн Куловду премьер-министр кызматына өткөрбөө керек деген ураан-талаптарды коюшту.

Кыргызстанды сактоо патриоттук кыймылдын кеңешинин мүчөсү Сапар Аргынбаев парламент премьер-министрликке Куловдун талапкерлигин экинчи ирет көрсөтүү аракетине каршы пикирин билдирди.

- Бийлик Феликс Куловду колунан жетелеп, премьер-министр кылабыз дегенине каршыбыз. Кулов саясатчы катарында өткөндө айтпадыбы, «мен жүдөтүп-жүдөтүп отуруп, кайтадан премьер-министр болом»,- деп ишенимдүү айтканы туура эмес. Анын айтканына караганда, ал Бакиев менен биргелешип алып, далай иштерди бүтүрөм деген сөздү кыйытты,-деди Сапар Аргынбаев.

Жогорудагы төрт кыймылдын мүчөлөрү, Феликс Кулов ХИПИКсиз эле Кыргызстанды экономикалык кризистен алып чыгам деген оюн билдирсе, ага эч кандай каршылык көрсөтүлбөстүгүн айтышты. Эгерде Кулов премьер-министрлик кызматка бекитилип, ХИПИК программасына кирүү максатынан кайтпай турган болсо, анда өлкө аймагында ар кандай нааразылык акцияларын өткөрүшүп, Кыргызстанды эл аралык каржы уюмдарынын туткунунан сактап калуу үчүн катуу аракеттерди көрүшөөрүн билдиришти.

XS
SM
MD
LG