Жөнөкөй кийим кийген куралчандар кечээ Йемендин баш калаасы Саананын борборундагы демонстранттарга ок ачканда беш киши окко учту. Президент Али Абдулла Салех бул окуяны иликтөөгө чакырды. Мунун алдыңкы күнү Салех бийликти өткөрүп берүү тууралуу келишимге кол койгон эле. Йеменди 33 жыл башкарган Салехту сот жоопкерчилигинен бошоткон бул келишимге каршы кечээ Саанада жана өлкөнүн түштүгүндөгү Таиз шаарында миңдеген киши демонстрацияга чыккан.Салехтин кетишин талап кылган толкундоолор өлкөдө он айдан бери өтүп келатат.
