Украин армиясы Донецк шаарын орусиячыл жикчилдерден бошотуу үчүн соңку даярдыктарды көрүүдө. Бул тууралуу Украинанын Улуттук коопсуздук жана коргоо кеңешинин өкүлү Андрей Лысенко Киевдеги брифингде маалымдады. Ал жарандарга кайрылып: "Биз жарандарды мүмкүн болсо Донецк жана Луганск шаарларынан чыгып кетүүгө үндөйбүз. Себеби, бул шаарларда террорчуларды жок кылуу боюнча операция өткөрүлөт”,- деди. Ошондой эле өлкө чыгышындагы антитеррордук операция учурунда 11-август, эртең мененки саат 9га карай украиналык 568 аскер өлгөнүн жана 2120 аскер жарадар болгонун кошумчалады.
