Ай нурунан түшкөн кыз

Чыңгыз Айтматовдун "Жамилясын" махабат жөнүндө улуу баян деп француз жазуучусу Луи Арагон аныктама бергени маалым. Ошондо согуштан күйөөсүн күтүп жүргөн Жамиля Даниярды ээрчип кетет эмеспи. Бул сүйүүнүн күчү да. Ошондой сүйүү кыргыз өнөрүнүн өлбөс, өчпөс жылдызы болгон Мыскал Өмүрканованын да тагдырына туш болгон экен. Мыскал эженин күйөөсү Сагынаалы согушка кетип кайтпай калат. Мыскал эже бой ырдап жүргөн кезинде ушул эле Сары-Өзөн Чүйдүн бир айылына гастролго барып калат. Концерттен кийин артисттерди ошол айылдын башкармасы коноктойт. Ошол башкарма Мыскал эжеге ашык болуп жүргөн экен, аялын, балдарын таштап, Мыскал эжени ээрчип кетет. Биз азыр ошол башкарма менен Мыскал эженин кызы Айнураны тааныштырабыз.