Орусия Сириядагы аскердик базасына заманбап, эң мыкты делген зениттик аткылоочу системасын жиберүүнү мерчемдеп жатат.
Владимир Путин бүгүн Екатеринбургда сөз сүйлөп, Москва Сириядагы аскерий базасына S-300 зениттик-ракеталык системасын жайгаштырарын кабарлады. Мурдарак коргоо министри Сергей Шойгу да орус бийлиги Сириядагы Хмеймим базасына S-400 ракеталык системаны жөнөтөрүн айткан эле.
Мындай билдирүү Түркия-Сирия чек арасында орус аскер учагын Түркия атып түшүргөндөн кийин жасалды. Окуя болгон жерде бир орус аскери өлтүрүлгөн.
Орусия куралдуу күчтөрүнүн генералдык штабынын жетекчиси Сергей Рудской 24-ноябрь күнү: “Биз кооптуу деп эсептеген бардык буталар жок кылынат”, - деген.
Анкара Орусиянын учагын Түркиянын аба мейкиндигин бузганы үчүн атып түшүргөнүн айтса, Москва орус истребители Сириянын аба мейкиндигинен сыртка чыкпаганын айтууда.
