Өкмөттүн Нарындагы өкүлчүлүгүнүн басма сөз катчысы Айнура Дүйшөк кызынын маалымдашынча, митингге чыккандар бийликке беш талаптан турган кайрылуу жолдошту. Алар 32 кишиден турган комиссия түзүп, президентке, парламентке жана өкмөткө кайрылуу даярдашкан. Анда бийик тоолуу шарттагы жеңилдиктер жоюлбагандыгын тастыктаган токтомду көрсөтүү, кыш мезгилинде электр энергиясына болгон жеңилдиктерди көбөйтүү, турак жайды жана автоунааны камсыздандыруу үчүн мажбурлабоо, жөлөк пулдарды көбөйтүү жана соцфонд төлөмдөрүн азайтуу талаптары жазылган.