Премьер-министр Сапар Исаков Нарын облусуна жасаган иш сапарында Түндүк-Түштүк автожолунун экинчи фазасынын курулушу менен таанышып, курулуш иштеринин сапатын көзөмөлдөөнү тапшырды. Өкмөт башчы жолду белгиленген мөөнөтүнөн кечиктирбей, бүтүрүүнү да милдеттендирди.
Ош-Бишкек жолуна альтернативалуу Түндүк-Түштүк автожолунун экинчи фазасынын узундугу 96 чакырым. Жолдун курулушу 2015-жылы августта башталган. Өкмөттүн маалыматы боюнча, бүгүнкү күнгө чейин жол курулушунун 38% аяктаган. Ушул тапта жолдогу узундугу 416 метрлик үч көпүрөнүн курулушу жүрүп жатат. Долбоор боюнча альтернативдүү жолдо узундугу 1,5 чакырымды түзгөн эки эстакада көпүрө бар.
Премьер-министр Нарынга сапарында Жумгал районундагы Баш-Кууганды айылында курулушу токтоп калган мектепте да болду. Баш-Кууганды орто мектебинде 570 бала окуйт. Балдардын көптүгүнө байланыштуу эски мектептин жанына 1989-жылы жаңы мектептин курулушу башталып, ал эки жылдан кийин токтоп калган.
Өкмөт башчы жыл аягына чейин мектептин курулушун бүтүрүүнү тиешелүү тараптарга тапшырды.
Премьер-министр Сапар Исаков Нарынга иш сапары менен 5-октябрда барды.