Жалал-Абад облусунун Сузак районунда машине коюп кеткен окуучулардын биринин абалы туруктуу.
Райондогу Октябрь айыл аймактык ооруканасынын дарыгери Өмүрзак Бороновдун "Азаттык" радиосуна билдиришинче, 9-класстын окуучусу баш мээси чайкалып, оң бутунан жараат алып ооруканага түшкөн. Анын ички органдарына операция жасалган, азыр абалы турукташып калды. Эми жабырлануучунун бутуна да операция жасалат.
3-декабрдын кечинде Жалал-Абад-Казарман жолунун 35-чакырымындагы Сузактын Кара-Чолок айылында жолдо четинде бараткан беш окуучуну машине сүзүп, айдоочу качып кеткен болчу. Андан окуучулардын бири каза таап, бири ооруканага жеткирилген.
Окуучуларды коюп кеткен "Нива" Таран-Базар айылынан табылып, ээсине издөө жарыяланган. (RsK)