Европа лидерлери Ирандагы жыйырмадан ашык демонстранттын өмүрүн алган окуяларды айыптап, Тегеранды тынч митингчилерге өз нааразылыгын эркин билдирүүсүнө уруксат берүүгө үндөдү.
Француз президенти Эммануэл Макрон 2-январда Ирандын президенти Хасан Роуханиге телефон чалып, митингдерде адам өмүрү кыйылып жатканына тынчсыздануусун билдиргенин анын кеңсеси кабарлады.
Ирандын президенттик администрациясы билдиргендей, Роухани бул сүйлөшүүдө Макронду баш кеңсеси Парижде жайгашкан "Мужахедин е-Халк" аттуу Ирандын оппозициялык тобуна чара көрүүгө чакырып, бул топту "демонстрацияларга шыкак берди" деп айыптады.
2-январда Европа Биримдигинин тышкы иштер министри Федерика Могерини да Ирандагы демонстрациялар учурунда катталган жоготууларга өкүнгөнүн билдирип, Тегеранды зомбулуктан алыс болууга чакырды.
Ирандын бир нече шаарында 28-декабрда болгон демонстрацияларда полиция менен кагылыштан кеминде 22 адам каза тапты. 450дөн ашык киши камакка алынганы белгилүү болду.
