Тажикстандын президенти Эмомали Рахмон Сада майрамына байланыштуу 29-январдагы телекайрылуусунда жарандарды сарамжалдуулукка чакырды.
"Калктын саны өсүп, азык-түлүктүн баасы жогорулап жатканын эске алганда үнөмдүүлүк жана сарамжалдуулук ар бир адамга жана ар бир үй-бүлөгө мүнөздүү сапатка айланды",-деди Рахмон.
Тажик лидери элди той-аштардагы ашыкча чыгымга тыюу салган "Каада-салтты, салтанат жана жөрөлгөнү тартипке салуу жөнүндө" мыйзамдын талаптарын аткарууга үндөдү.
Тажикстанда Сада майрамы Ноорузга 50 күн калганда - 30-январда белгиленет. Нооруздун жана жаздын жарчысы катары белгиленген бул майрам 2017-жылы Тажикстандын улуттук майрамдарынын тизмесине киргизилген.
