Бириккен Араб Эмираттарында өтүп жаткан футбол боюнча Азия биринчилигинде бүгүн, 16-январда Кыргызстандын футболчулары Филиппиндин командасы менен беттешет.
Кыргызстандын "Ак шумкар" командасы эки оюн катары менен утулганына карабай, тайпадан чыгуу мүмкүнчүлүгүн жогото элек. Ал үчүн бүгүнкү оюндарда жеңиши керек.
Бул тайпада Кытай менен Корея кийинки финалдык бөлүккө жолдомо алышкан. Кыргызстан оюнду улантабы-жокпу, бүгүнкү беттеште чечилет.
Кыргызстан-Филиппин беттеши Бишкек убактысы боюнча саат 19.30да башталат.
Кыргызстан Азия кубогуна биринчи жолу катышууда. Тайпадагы алгачкы оюнунда "Ак шумкар" командасы Кытайга 2:1 эсебинде, экинчи оюнунда Түштүк Кореяга 1:0 эсебинде утулган. (SDz)
