4-февралда Ташкентте Өзбекстан менен Евробиримдиктин ортосундагы кызматташтыкты кеңейтүү жөнүндө сүйлөшүүлөрдүн биринчи айлампасы башталды. Документ соода-сатыкка, инвестицияга жана аймактык коопсуздукка артыкчылык берет.
Документке Өзбекстандын президенти Шавкат Мирзиёевдин быйыл Брюсселде өткөнү жаткан сапарында кол коюлат деп күтүлүп жатат. Бул тууралуу “Азаттык” радиосунун өзбек редакциясы билдирди.
Былтыр 23-ноябрда Ташкент менен Брюссел келишимди сүйлөшө баштаганы маалым болгон.
Өзбекстан менен Евробиримдиктин ортосундагы азыркы иштеп жаткан макулдашуу 1999-жылдын 1-июлунан тартып иштей баштаган.
Ушул тапта Евробиримдик Өзбекстанда жалпысынан 103 миллион евролук 25 долбоорду ишке ашырып жатат. Алар - экономика жана социалдык өнүгүү багытындагы долбоорлор. Жалпы суммасы 33,5 миллион евролук 10 аймактык долбоор да иштеп жатат.
