Ооганстанда 28-сентябрда өткөн президенттик шайлоонун жыйынтыгын жарыялоо мөөнөтү бир нече аптага жылдырылды. Өлкөнүн Көз карандысыз шайлоо комиссиясы жыйынтык 14-ноябрда гана белгилүү болорун билдирди.
Планга ылайык, президенттик жарышта ким утканы 19-октябрда эле белгилүү болушу керек эле. Бирок комиссиянын төрайымы Хава Алам Нуристани "ылдамдык үчүн ачык-айкындуулукту курмандыкка чалбай турганын" 27-октябрда Кабулда журналисттерге айтты.
Бул шайлоодо негизги атаандаштык президент Ашраф Гани менен башкы аткаруучу Абдулла Абдулланын ортосунда болду. Экөө тең шайлоону жеңгенин жарыялап, бири-бирин "добуштарды бурмалады" деп айыптап жатат.
Эгер талапкерлердин бири да 50 пайыздан көп добуш топтой албаса, анда президенттик шайлоонун экинчи айлампасы өтөт.
