Линктер

ЧУКУЛ КАБАР!
28-ноябрь, 2020 ишемби, Бишкек убактысы 06:01

Абылгазиев: жыштыктарды текшерүү тууралуу мен тапшырма бергем


Мухаммедкалый Абылгазиев.

Парламенттин 21-майдагы сессиясында премьер-министр Мухаммедкалый Абылгазиев жыштык сатуудагы коррупция боюнча козголгон кылмыш иши тууралуу депутат Талант Мамытовдун суроосуна жооп берди. Өкмөт башчы жыштык сатууга өзүнүн тиешеси жок экенин айтты.

«Бюджетти толтуруш үчүн каражат издеп жатып, жыштыктар боюнча абалга кайрылганбыз. Аны карап көрүү тууралуу 2019-жылы мен тапшырма бергем. Радио жыштык - мамлекеттин байлыгы. Анын аткарылышын кароо учурунда эки фактыга кабылдык. Бири - компанияларга берилбей, мамлекеттин балансында турган жыштыктар. Экинчиси - мурда берилип кеткендер. 1000 сомго берилген учурлар бар экен. Алар убактылуу пайдаланууга алгандар. Ошолордун тагдыры кандай болуп атат дегенде бир факты чыккан. Бир компания экинчи бир компанияга убактылуу алган жыштыкты саткан. Мамлекет болсо аны убактылуу пайдаланууга берген. Биз бул туура эмес, буга мыйзамдуу түрдө чек коюп, эгерде өзү пайдаланбаса, лицензиянын шартын аткарбаса, кайра мамлекетке кайтарып, аукцион аркылуу сатыш керек деген чечимге келдик. Мен бул иштер тууралуу президентке маалымат бергем. Анын тапшырмасы менен Экономикалык кылмыштарга каршы күрөш боюнча мамлекеттик кызматка (Финансы полициясы) тапшырма бергем, факты боюнча кылмыш иши ачылып, текшерүү жүрүп жаткан. Кийин «Ala TV» боюнча дагы бир факты ачылды. Ал да 1998-жылы телекөрсөтүү багытында жыштык алып, колдонуп жүрүп, «Билайн» компаниясына саткан экен. Бул жерден мамлекеттик кызматкерлер аралашканы тууралуу ар кандай маалымат болду», - деген Абылгазиев бул иш боюнча канча киши шектүү катары өтүп жатканын так айткан жок.

«Тергөө жүрүп жатат. Мен ачыгын айтпай эле коеюн. Эки-үч мамлекеттик органдын кызматкерлери кармалган. «Мегакомду» жыштыгы менен кошо 250 миллион долларга сата албай койгонбуз. «Жыштыкты 900 миллион долларга сатса болот» десе, мен бир чети «ошондой болсо кана» деп кубандым. Сандарды такташ керек да! Мен андан аз болот деп эсептейм. Бирок баалуулугу бар. Сурак жүрүп жатат. Кайсы стадиясына келгенин айта албайм. Башында өкмөт башчы катары мен баштагам. Таиров (Ред: Финансы полициясынын башчысы Бакир Таиров) мага «мурунку башталган иш менен кийинки ишти бириктирип, прокуратура сурап жатат» деген маалымат берди», - деп билдирди премьер-министр.

Абылгазиев 21-майда Жогорку Кеңеште «2020-жылга карата республикалык бюджет жана анын 2021-2022-жылдарга болжолу жөнүндө» мыйзамга сунушталган өзгөртүүлөр боюнча талкууга катышты.

Бир күн мурда депутат Жанарбек Акаев парламент трибунасынан «премьер-министр Мухаммедкалый Абылгазиев бул ишке катышы жок экенин далилдесин» деген талап койгон.

Байланыш боюнча мамлекеттик агенттиктеги жыштык сатуудагы коррупциялык иш үчүн шектүү катары беш киши камакка алынганын, өкмөттөгү айрым жогорку кызмат адамдары да сурак берип жатканын аскер прокурору Нуркамал Набиев парламенттин бүгүн, 21-майдагы сессиясында билдирген.

12-майда Байланыш боюнча мамлекеттик агенттиктин мурдагы директору Наталья Черногубова коррупция үчүн шектүү катары кармалган. Ага уюк байланыш операторлорунун бирине жыштыкты мыйзамсыз кайра каттаган деген айып коюлган.

Бул иш боюнча өкмөттүн аппаратынын жетекчиси да суралып жатканы, «Ala-TV» компаниясынын жетекчилеринин бири кармалганы кабарланууда. Укук коргоо органдары Черногубованын кармалышы тууралуу эки күндөн кийин маалымдаган. Калган шектүүлөр тууралуу комментарий бере элек. (NT)

Пикирлерди көрүңүз (5)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG