Борбордук шайлоо комиссиясы Жогорку Кеңештин депутаттарын шайлоо алдындагы үгүт иштерине катышуу үчүн Кыргызстандын 14 маалымат каражатын жана интернет-басылмасын аккредитациялайт. Мындай токтом БШКнын 30-июлдагы жыйынында кабыл алынды. Бул маалымат БШКнын сайтында жарыяланды.
Парламенттик шайлоо алдындагы үгүт иштерине катышуу үчүн жалпысынан 210 ЖМК жана интернет-басылма арыз берип, тизмеге катталган. Алардын 57си телекомпания, 52си гезит-журнал, 26сы радио жана 75и интернет-басылма.
Эфир убактысы, басма аянты жана интернет-басылмага жарыялоо укугу үчүн акы төлөө шарттары тууралуу маалымат БШКнын расмий сайтына жарыяланган.
Кыргызстандагы кезектеги парламенттик шайлоо быйыл 4-октябрга дайындалган. Шайлоого катышуу ниетин жалпысынан 44 саясий партия билдирген, БШК алардын бирөөнүн ыйгарым укуктуу өкүлүн каттоодон баш тартып койгондуктан азыр соттошуу уланууда. (ZKo)