Линктер

ЧУКУЛ КАБАР!
24-Январь, 2021 жекшемби, Бишкек убактысы 22:08

Садыр Жапаров: бардык соккуну өзүмө алып Жээнбековго макам берүүгө кол койдум


Садыр Жапаров жана Сооронбай Жээнбеков. 2020-жыл, 16-октябрь.

Президенттин милдетин аткаруучу, өкмөт башчы Садыр Жапаров Ош шаарында эл менен жолугушууда Сооронбай Жээнбековдун экс-президент макамы боюнча пикирин билдирди. Жапаров Жээнбековго экс-президент макамын ыйгарууга каршы чыккандар болгонун билдирди.

«Экс-президент макамын берүүгө каршы болгондор болду. Бирок мен бардык соккууну өзүмө алып, экс-президент деген наам берип, буйрукка кол койдум. Анткени, бизде 30 жылдан бери экс-президентибиз жок. Экөөнү кубалап ийгенбиз, бирөөнүн макамын алып түрмөгө тыкканбыз. Сооронбай Шариповичти да кубалап, түрмөгө тыксак мындан кийин да терс көрүнүштөр улана бербейби деп ойлоп, ырым кылып ушундай кылдым», - деди Жапаров.

Баш мыйзамдын 69-беренесине ылайык, өз каалоосу менен кеткен мамлекет башчыга экс-президент макамы автоматтык түрдө ыйгарылат.

Жогорку Кеңеш 2019-жылдын 27-июнунда «Кыргыз Республикасынын президентинин ишмердигинин кепилдиги жөнүндө» мыйзамга өзгөртүү киргизип, Алмазбек Атамбаевди экс-президент деген макамдан ажыраткан. Учурда камакта отурган Атамбаев 2011-2017-жылдары Кыргызстандын президенти болгон.

Быйылкы парламенттик шайлоодон кийинки нааразылыктан соң президенттиктен кеткен Сооронбай Жээнбековго экс-президент макамы ыйгарылды. 2010-жылдагы апрель окуяларынан кийин президент статусунда Убактылуу өкмөттү жетектеген Роза Отунбаевнын экс-президент макамы бар.

Кыргызстанда 4-октябрда кезектеги парламенттик шайлоо өтүп, анын жыйынтыгына нааразы болгон он чакты саясий партия 5-октябрда Бишкекте митинг өткөргөн. Митинг башаламандыкка айланып, кийин бул окуя бийликтин алмашуусуна алып келген. Сооронбай Жээнбеков 15-октябрдан президенттиктен кетерин жарыялап, 16-октябрда кызматын толук өткөрүп берген. Азыр президенттин милдетин башаламандык убагында тарапкерлери түрмөдөн бошотуп алган премьер-министр Садыр Жапаров аткарып жатат. (TSh)

Пикирлерди көрүңүз (19)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

Сунуш кылынган арга.

XS
SM
MD
LG