Линктер

ЧУКУЛ КАБАР!
15-Июнь, 2021 шейшемби, Бишкек убактысы 22:03

Өмүрбек Бабанов: Президенттикке талапкерлигимди койбойм


Садыр Жапаров жана Өмүрбек Бабанов.

«Республика» партиясынын лидери Өмүрбек Бабанов социалдык түйүндөгү жеке баракчасынан элге кайрылуу таратты. Ал өз кайрылуусунда 5-ноябрда премьер-министр, президенттин милдетин аткаруучу Садыр Жапаров менен жолукканын, ал өлкөнү олуттуу өзгөртүүгө даяр экенин көргөнүн жазды.

«Өлкөбүздөгү саясий-экономикалык абал курч экендигин бардыгыбыз көрүп турабыз. 5-октябрда элди толкуткан кесепеттерди түп-тамырынан жоюп, тезинен өнүгүү жолуна түшүүгө бизде мүмкүнчүлүктөр бар!

Кечээ Садыр Нургожоевич менен жолуктум. Өлкөбүздү өнүктүрүүгө керек болгон терең маселелерди ачык талкууладык. Өлкөбүз эркиндикти туу тутуп, демократиянын нугунда гана тез өнүгө аларына окшош пикирде экендигибизди ачык көрдүм. Садыр Нургожоевич мурдагы башкаруучулардын каталарын кайталабай турганын, олуттуу өзгөрүүлөргө даяр экендигин көрдүм.

Конституциялык реформаны да кеңири сүйлөштүк. Эң негизгиси, бийлик бутактарынын тең салмактуулугун түзүш керек. Сот системасынын толук өз алдынчалыгын камсыз кылып, парламентти күчтөндүрүш керек экендиги тууралуу так түшүнүк бар!

Мени колдоп келген бардык адамдарга, тилектештериме ыраазычылык билдирем! Партиялаштарым менен акылдашып, Кыргызстандын президентинин кызматына өз талапкерлигимди алып чыкпоону чечтим», - деп жазган.

Буга чейин президенттик шайлоого Бабанов катышарын айрым басылмалар жазып келген. Бирок ал бул маселе боюнча комментарий бере элек болчу. (BCh)

Пикирлерди көрүңүз (39)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG