Кыргызстандык жеңил атлет Мария Коробицкая 6-декабрда Ташкент шаарында өткөн Ташкент эл аралык марафонунда олимпиадалык нормативди аткарып, Токио-2020 Олимп оюндарына жолдомо алды. Бул тууралуу Кыргызстандын Жеңил атлетика федерациясы билдирди.
Анын маалыматына ылайык, Мария Коробицкая аталган марафондо 42 чакырым 195 метр аралыкты 2 саат 26 мүнөт 42 секундада чуркап өтүп, марага жеткен. Ал марафондун баш байгесин утуп, олимпиадалык нормативди аткарган. Марафондо олимпиадалык норматив 2 саат 29 мүнөт 30 секунданы түзөт.
Коробицкаянын жолдомосу - Кыргызстандын капчыгындагы алтынчы олимпиадалык жолдомо. Буга чейин кыргызстандык беш спортчу Жапонияда өтчү Олимп оюндарына жолдомо алган. Алар - балбандар Айсулуу Тыныбекова, Атабек Азизбеков, суучул Денис Петрашов жана жеңил атлеттер Юлия Андреева менен Дарья Маслова.
Жаштар иштери, дене тарбия жана спорт агенттиги билдиргендей, 2020-жылы Токиодо өтө турган жайкы Олимпиадага 20га жакын спортчунун лицензия алууга мүмкүнчүлүгү бар. (GT)
