Линктер

ЧУКУЛ КАБАР!
28-Сентябрь, 2021 шейшемби, Бишкек убактысы 01:13

Аксы районунун акими болуп Жыргалбек Шакиев дайындалды


Өкмөт Үйү.

Жалал-Абад облусунун Аксы районунун мамлекеттик администрациясынын башчысы - акими болуп Жыргалбек Шакиев дайындалды.

Тиешелүү буйрукка премьер-министрдин милдетин аткарып жаткан биринчи вице-премьер-министр Артём Новиков кол койгонун өкмөттүн басма сөз кызматы 5-январда кабарлады.

«Бийкомпакт» ишканасынын директорунун орун басары деген Жыргалбек Шакиев 41 жашта. Ал былтыр 4-октябрда өткөн парламенттик шайлоодо «Мекенчил» партиясынан талапкер болгон.

Аксы районунун мурдагы акими Эсеналы Ормоналиев 4-январда нааразылык акцияларына байланыштуу арызын жазганы маалымдалган.

2020-жылдын 7-октябрында Аксы районунун борбору Кербен шаарында акимди кызматтан кетирүүнү талап кылып чогулгандар менен аны колдогон тараптын митинги жапырт мушташ менен коштолгон. Мушташта катуу жабыркаган 41 жаштагы Уланбек Жаманкулов 20 күндөн кийин ооруканада каза болгон. Окуяда алты киши жабыркаган.

Милиция тополоңду уюштурууга шектүүлөрдүн бири катары Кутман Шадыбековду камакка алган. Кийин анын жакындары Тургун Шадыбеков менен Жылдыз Шадыбеков да кармалган.

2-январдан бери Жалал-Абад шаарында жана Аксы районунда Шадыбековдун тарапкерлери нааразылык акциясына чогулуп, жол тосууга чейин барышкан. Алар ишти калыс иликтебей жатат деген негизде, райондук милиция башчысын жана акимди кызматтан алууну, Шадыбековду үй камагына чыгарууну талап кылышкан.

4-январда ички иштер министринин буйругу менен райондук милиция башчысы Шекербек Таңгиров ээлеген кызматынан бошотулду.

Экинчи тарап Шадыбековдор райондогу кадр саясатына кийлигишип, ар кандай чагымдарды уюштуруп келгенин, октябрда Бишкектеги башаламандыктан пайдаланып акимди кетирип, өз кишисин коюу максатында эл чогултканын айтып жатат.

Кандуу окуяда жабыркаган тарап милицияга ишеним көрсөтпөгөндүктөн, ишти атайын кызмат иликтөөдө. (NT)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG