Линктер

ЧУКУЛ КАБАР!
5-Август, 2021 бейшемби, Бишкек убактысы 14:59

Бишкек-Исфана авиакаттамы жанданды


Исхак Разаковдун аты берилген Исфана аэропорту 1974-жылы курулган.

2020-жылдын мартында коронавируска байланыштуу карантин киргизилгенден бери токтоп турган Бишкек-Исфана-Бишкек авиакаттамы 18-январдан тартып жанданды. Бул тууралуу «Манас» эл аралык аэропортунун сайтында кабарланды.

Сайттагы маалыматка таянсак, каттамдарды жумасына бир жолу дүйшөмбүдө «Тез Жет» авиакомпаниясы жүргүзөт. Бишкектен учак саат 11:00дө, Исфанадан кайра Бишкекке 14:20да учат.

Карантинде ички жана сырткы каттамдар токтотулуп, кийинчерээк Бишкек-Ош багыты жанданган. Жалал-Абадга, Баткенге такай каттамдар толук жолго коюла элек.

Бишкек-Исфана-Бишкек багыты Кыргызстандагы эң пайдалуу ички каттамы катары сыпатталат. Ал аркылуу Тажикстандын Согди облусунун тургундары Бишкекке, андан ары Орусияга жана башка чет мамлекеттерге катташкан. Кийинчерээк Бишкек-Исфана авиакаттамы бир канча жолу токтоп, кайра ачылып турган.

Исхак Разаковдун аты коюлган Исфана аэропорту 1974-жылы курулган жана салмагы 22 тоннага чейинки учактарды күндүз гана тейлөөгө ылайыкташтырылган. Бишкектен ал жакка учуу убактысы – бир сааттын тегерегинде, аралыгы – 545 чакырым. (TSh)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG