Москвада коопсуздук күчтөрү Сухаревская аянтын курчоого алышты. Ал жерде адамдар жапырт кармалууда. Бул тууралуу “Настоящее времянын” кабарчысы билдирди. Аянтка Росгвардиянын 10 автобусу келди. Жарым саат мурун Леонид Волков дал ушул аянтка чыгууга чакырган.
Москванын борборундагы соода борборлору жана дүкөндөр 31-январда иштебей турууну чечишти. Бул тууралуу борбор калаанын бийлиги билдирди.
"Алексей Навальныйды колдогон, бийлик менен макулдашылбаган митинг учурунда Москванын борборундагы дүкөндөрдүн жана кафелердин жабылышы рекомендациялык мүнөзгө ээ", - деди Москванын соода жана тейлөө департаментинин башчысы Алексей Немерюк. Анын айтымында, шаар бийлиги Любянкадан 100 метр аралыкта жайгашкан дүкөндөргө жана кафелерге 31-январда ачылбашы керек деп сунуш кылган.
“Настоящее время” каналынын кабарчылары билдиргендей, борбордо адамдар камакка алына баштады. Тактап айтканда, милиция кызматкерлери "конокко келдим" деп айткан адамды кармап кетишти.
Кремлдин айланасына темир тосмолор орнотулду. Моховая көчөсүндө, Манежная аянтында, Театральныйда тосмолорду Ички иштер министрлигинин жана Росвардиянын кызматкерлери кайтарып турушат.